اجمل القصائد والقصص💫💫

 آخر ما كتب القلم ونظرت ليكي من بعيد لـ بعيد، والحلم باصص بس متكتف والرؤيا.. رافض قلبها التأويل، وانا كنت "يوسف".. بترمي فـ البير الفرق إني.. اتهمني الديب، دمي اللي سال.. ده حقيقي مش تمثيل ولَقيتي بعدي..  1000 1000 بديل                 كل اللي مات.. كان كل يوم بيقول:  بعده مفيش ولا حد حتحبيه. بس اللي صار.. إن انتي حبيتي، والكدب سارح.. بين غيطان الحق والكلمة تايهة، والجدار عازل قلبي.. يا نازف بين ضلوعك يأس، ومعادش ليك.. غير خنقتك والكاس، والحيرة.. ضاربة عرض عرض الحيط، وسجارتي واحدة، والشرف دخان وقت اغتصاب الحلم..  كان الحبيب هيمان كان فاكر إنه قال: هيحميكي؛ أتاريه بينزع كل يوم فـ التوب، والتوب يدوب.. كان نص متر مفيش كل اللي عشته.. دنيا مـ التهميش وهلوم عليكي.. والعتب على مين؟! اسمي واسمك فـ الوجع.. إخوات كتب القلم.. إن احنا مـ الأموات بس انتي - مهما يموتوا فيكي - هتقومي.. رافضة للكفن والموت وافضل أنا.. شايف حدود الموت،  تايه ما بين الأرض والملكوت