ملك الحمير للشاعر مجدي حسن
اعتذر لاستخدام بعض الكلمات والتى قد تكون غير محبَبَه فى القصيده
قصيدة / مَلِك الحِمير
آسف مَلِك الحِمير
بياكلوا من لحَمَك كِتير
عَمَلوا مِنُه كَباب وكُفتَه
وأكلوا مِنُه هُبَر وفَتَه
مع كُل مَعدومى الضَمير
آسف مَلِك الحِمير
عايش عشان تِشيل يادوب
مش لَحمَه فى جِزارَه ومَصلوب
مِنغير ضَمير مِنغير كِسوف
باعوك على إنَك خَروف وان حتى كُنت من الدَواب كان مالَك انتَ بالكَبَاب
مع ناس لاعِرفوا مَعنَى دين
ولا خافوا من يوم الحِساب
لو عِرفوا قيمتَك
مِقدار ذكاوتَك
ماكانوش فى يوم إستَحمَروك
يمكِن لطِيبتَك وتُقل شيلتَك
يوم استهانوا ويوم هانوك
وباعوا من لَحمَك كِتير
آسف مَلِك الحِمير
ماانا زَيَّك كُنت حِمار
صابِر دايمآ وحامول
بَتحَمِّل بَرد ونار
وبَشيل فى هِموم وحِمول
وبَقول الدُنيا عَمار
واللى بيصبُر بينول
واتارى الدُنيا مَصالِح
والطالِح سِيد الصالِح
مابقِتش الدُنيا مواقِف
حِوارات وكَلام مَعسول
تديهُم أد ماتِقدَر
يسقوك المُرّ ف سُـكَّر
لَو تِتعب أو يوم تِكبَر
طَلقَه وف الراس مش أكتَر
إن كُنت حِمار مَغصوب
انا كُنت حِمار بإرادتى
بتشيل الناس والطوب
مَنا شيلت سِموم لسعادتى
على ضَهرى الكُل بيركَب
ومعاه كُرباج وبيضرَب
واتحَمِّل مهما اتحَمِّل
واخسَر والكُل بيكسَب
كُنت بصَبرى أوضيهُم
واظلِمنى عشان أرضيهُم
ويقولوا يمين اوديهُم
ويقولوا شمال اوديهُم
واتأكِدت إنى حِمار
بَعد ماخِلص المِشوار
من بَعد ماضاع العُمر
والوَقت خلاص مش وَقتى
ولَقيت سِكينِة غَدر
وَصَلِت مِنهُم لِرقابتى
من بَعد عَذابى ويأسى
أسَفى من نَفسى لنَفسى
دا انا كُنت حِمار وكبير
آسِف .... مَلِك الحِمير
شِعر / مجدى حسن
تعليقات
إرسال تعليق