تحويشة العمر للشاعر مصطفى فريد
بناءا على طلب بعض المبدعين نشر القصيدة مكتوبة
قصيدة / تحويشة العمر
من ديوان تحويشة العمر
للشاعر مصطفى فريد
حوشتهم لبكره ضى ؟!!!!
شلتهم لاجل اللي جي ؟؟
عشت اب وستر ليهم والسند
والمستند وقت الشدايد والمحن
رغم الظروف عشت الممد
ضحيت عشانهم والتمن
زاد سكرك .....
ضغطك علي وهد البدن ...
ملح الشقا. . شقق إيديك
وابتليت ....
الزمن خد نور عنيك
بس عمرك ما اشتكيت
عريت تفاصيل جتتك
وسترتهم باللي عليك
مابين ايديك عاش الوفا
وبين صوابعك مضيفة
للكل من حواليك
والقلب يدعي بالشفا
لو حد فيهم انكفا
او يوم تعب
عشت تحلم بالدفا
وانت بينهم لما كانوا صغيريين
والهزار بكفوف رقيقة
لما تنزل على الخدود الشقيانين
حبة حبة بالمحبة
كنت تشبع مالسعادة
لما تلقى فى حضنهم لحظة حنين
ولما توصل للبكا
تاخد الزاوية الشمال
وتسيب لهم كل اليمين
وتدارى منهم دمعتك
لاجل ما يحسوا بآلامك
لا البنت جات يوم طبطبت
ولا الولد للدمع شال
زمن ومال ....
القسوة فاقت الاحتمال
شربوك كاس الجفا
القلب ضلم واختفى ورد الربيع
فوق خدك المليان أسا
ماعاد وفا .....
الكل باعك وانطفى فيك الزمن
سابوك مريض رموك بعيد .....
بعد الكمد ماهد فيك سبع الرجال
عرق السنين المر اتحول لمي !؟
كنت متعشم فى يوم راح يسندوك
يوم ماتكبر او تشيب !!! ؟؟
الدمع وحده هو بس اللي حزن
يومها عليك صعبان عليه من دنيتك
كان مصطفيك مش ناسي طيب عشرتك
لما كنت بتحضنه بمنديل ورق
وهو نازل عالخدود
كان بيبكي بحرقة من ألم الفراق
كل دمعة حب بتطبطب عليك
وهى نازله بتسألك ?????
فين طلتك فين بسمتك ؟؟؟؟
والآهه تصرخ ألف صوت
بعد الجحود برك الجمل
الجرح لساه ما اندمل
والقلب شاب والشباب مالعمر ضاع
وانت على نول السنين
لساك بتغزل بين إيديك
شال الشجاعة فوق منوال العدم
وانت اللى باني فى حضنهم
جدران أمل ......
ايام ماكنت بصحتك
والقلب كان دقه عفي .....
حلمك خلاص خسر الرهان
بعد الولاد ماقرروا يعيشوا بس لنفسهم
الكل اختار له ولي يكون له حبيب
الولد اختار له زوجة عاملتك زي الغريب
والبنت سافرت ويا زوج
والبعاد قسمه ونصيب بقرار عجيب
اختاروا ليك دار بالإيجار
مش من جيوبهم انما من أصل خيرك
من شقاك فيها اللي زيك يشبهوك
مستنيين حكم القدر
مابين حيطان صابها إكتئاب
رحلة سفر متغلفة بسنين عذاب
كنت فيها انت البطل
نسيوك هناك بقيت غريب
الكل طالب بالنصيب من تركتك
وانت اللي دايق بعدهم
ما سألوا فيك لاجل مالك
قطعوا فيك وانت حى
مضغوا لحم القلب نى
صرختك مش عايزة تطلع
والدموع عالخد ضى
والذكريات الفايته مالعمر اللي فات
نار بتحرق فى اللي جى
وانت بين اربع حيطان
عشت ميت وانت حى
تعليقات
إرسال تعليق