غيرة للشاعر عبدالخالق برغوط

 غيرة

يلا ف نفسك ذرة حقد و شك و غيرة 

أكيد ايمانك باطل و ذنوبك كثيرة

انت اللي محرّف دينك و هواك متبّع

جاي تعلمني ديني و تكذّب السيرة

جاي تفقّهني الحريّة فالتعبير و الفن

و رسمت سيدنا النبي و ضحكت عليه بتصويرة

ما تضرّو بافعالك ما توصلو منك أذيّة

و فاش ضرّو ابو جهل و لا حتى ابن المغيرة

قالو عليه شاعر؛ مجنون

 و قالو عليه سحّار

شحال رماوه بالباطل 

و قالو فيه كلام العار

و هو من السماحة اللي فيه

كان يوصّي على سابع جار

راه شفيع الأمة يا عالَم

و هو النبي المختار

صلّيو عليه... ( صلى الله عليه و آله و سلم ) 

صليو عليه و خلّيو الجُهّالة يقولو

و شحال قدهم يألفو و الله ما يوصلو لو

هما سمعو بيه و كذبو الرسالة

تعماو بالدنيا و غرورها

وتاهو فدروب الضلالة

و حنا حبّيناه؛ واخا گعما شفناه

و الشهادة ما تكون مكمولة

إلّا بذِكرو من بعد الله

صليو عليه... ( صلى الله عليه و آله و سلم)

حبّيناه لكلامو؛ لافعالو؛ لدينو دين الحق

و شحال من عالِم اشهد بمُعجزاتو و صدّق

راه سيدنا محمد بكلام الوحي كينطق

صلّيو عليه... ( صلى الله عليه و آله و سلم)

صلّيو عليه و اللي ما صلى ما هو منا

ما ينال شفاعتو و ما يدخل الجنة

### عبد الخالق برغوط ###