الشاعر الحزين للشاعرة نجاح حسنين
الشاعر الحزين
انا الشاعر أنا المحروم
من الحب من سنين
بعصر ورد الكلام في أزايز
واهديه لكل العاشقين
والملم أوراقه غناوي
يهديها حسن لنعيمة
دورت عليكي كتير ياحبيبتي
واحترت ويا نجوم السما المتنتورين
واما لقيت بهية قلت دي حبيبتي
وبنيت لها قصر في قلبي بس
لجل بختي طلعت بهية حبيبة ياسين
ورجعت من تاني ألملم خيوط النهار
وأداوي بيها قلبي من الانكسار
لقيتني بغزل في وحدتي خيوط الليل
وقلبي حيران في الضلوع يعاني
كما الطير المدبوح يقاسي الويل
واما قلبي شاف سندريلا
واتشعلق في ديل فستانها
ورقصت معايا في الحفلة رقصتها
وسابت في ايدي عطر وردتها
بس ياخسارة سبقني الأمير لبيتها
ويقولوا سهران فرحان وبيغني
انا الليل ....... أنا الويل
انا اللي قطر العشاق فاتني
أنا اللي الزمان في قبره وأدني
ويقولوا قال شاعر سعيد
بايت في حضن خله ليلة العيد
دنا الشاعر الحزين عصرت
الورد في أزايز وهاديته للعاشقين
وانتور أوراقه في الهوا
فتنزل جناين على المغرمين
زود وانبي ياعم وقول
أنا الشاعر المحروم الحزين
يعبي لي الزمان المر في كاسات
بيشربها قلبي بقاله سنين
بقلمي نجاح حسنين
تعليقات
إرسال تعليق