كومبارس للشاعرة سماح مشعل
كومبارس
مش حمل كلام
وعتاب وملام
ولا حمل معافرة مع الأيام ولا صد و رد
الحب اتحول حٍمل تقيل
وأنا حيلى اتهد
ف بميل للريح علشان تمشى
وبسلم للأيام نفسى
وماعودتش أقول انا كان نفسى
ما انا قولت زمان
أنا قولت زمان انا عايزة اكون عبلة يا عنتر ما لقيتش الرد
والقلب الأخضر لما بيحزن وبيتصد
بيتأثر وبيطرح يأس
ف قسيت على قلبى وعلمته مايروحش لحد
علمته يقفل شبابيكة
يدفى بنفسه ومع نفسه فى حيطانة البرد
وان داس ع الشوك يفرح ويقول الله ع الورد
انا تبت غرام
وإسأل أحلام العمر إزاى أنا خبيتها فى شوال الملح
والجرح إللى جرحتولى زمان
عدد الأيام بقا مليون جرح
القصة إياها بين البطلين
الفيلم البائس فى الخمسين أبيض وأسود بقا بالألوان
ونهايته نهاية فيلم زمان
ماهو مهما أتلون شكل الأرض السما حتما تفضل زرقا
والعشق الغبى آخرته حتما تبقى الفرقه
ف عشان ما نعيدش فى دى اللقطة
اعمل نفسك مش متحمس وماهيش فارقة
أنا سبت الكادر
وحذفت الأسم ف أى أفيش
فضلت أعيش عيشة الدراويش
وأتوه ف الدايرة المقفولة
وأفرح وأنا بمشى على الكورنيش
وأنا مجهولة
مش طالبة معايا أكون فايزة
وأتصور وأنا ماسكة الجايزة
ما انا بخسر م الجولة الأولى
أنا ماشية طريق سكته واحدة
مافيهوش راجعه
وطريقك عكس
ف اسال نفسك كدة بالمنطق
هل م الجائز بكرة
يكون أمس
طلبك مرفوض
مش بامضى عقود
ولا ب ادى عهود
ده مفيش مجروح بالفرح يجود
قررت أعيش دنيتى كومبارس
كومبارس
#سماح_مشعل
شكرا جزيلا للنشر والتوثيق دمتم منبرا راقيا للإبداع
ردحذف