ساحر أراجوز للشاعر خالد عاطف أبو العزم
الفرقُ ليس تجاعيدُ عمرٍ .. إنها تجاعيدُ روح .
ساحر أراجوز
============
لو كنت بدايه
أنا برضو ختام
فيه فاصل بينَّا سنين ،
أوهام
متصاحبه معايا ،
وشويِّة أحلام اتفضحِت
سَتَرتها ملايه ،
وشويِّة حُب
اتبقّوا .. ف قعر الكوبايه ،
ومحاضر .. إشغال للدنيا ..
وسحب الترخيص .
على قد ماكنت وانا صغيّر .. غالى
دلوقتى .. رخيص
خلِّيك ع الحيطه .. ف بروازك
نتكلم
والناس سامعينَّا
هل فاضل لسَّه حاجات مشتركه ما بينا ؟
يجوز ؟
يمكن مش شايف منهم .. إلّا ملامح !!
أوقات تتصالح !!
من غير ما انا وانت نعوز !!
بس انت ب تفضل .. خالد .. ساحر
وانا .. خالد .. اراجوز !!
على قد ما فاصل بينا العمر ..
ب يجمع بينَّا .. السيرك !!
وبَشر .. أشكال .. والوان
على أيامك .. مِشيّت جنبَك
وف أيامى .. ب تمشى
لكن على السِلك !!
وانا .. تحت السِلك
يسقط على راسى .. تراب
- كان لازق .. تحت نِعالهُم -
أصرخ
والعَنهُم
وافضل ف مكانى
بدون إبداء أسباب !! .
مخنوق مِنَّك
أول ما ب اشوفَك
- لو ب اضحك - أشعر بهزيمه
وكأنى جريمه
من قبل ما تحصل
من فاعل مجهول
خَلّيّك معقول
وبلاش .. تطالبنى
إنّى البس نفس هدومَك
وأخلّى عيونى بريئه
ب شَكْل عيونَك
مش ح اعرف اتحرَّك من تحت السِلك
ف بلاش تطالبنى .. أكون زيَّك
ساحر ف السيرك
فيه حاجات مش ممكن تحصل مهما نعوز
ضِحك الخسران .. مش هوَّ الفوز
والساحر .. بعد ما ب يعجّز
لازم يتكرَّم ..
يترقّى لرتبة .. أراجوز .
تعليقات
إرسال تعليق