مقام ابليس للشاعر خالد عاطف أبو العزم
لوجهِ الحقيقةِ .. غالباً ما لايتمُ توقيعَ العقودِ مع الشيطانِ تحت تأثيرِ المُخَدِّر .
مقام إبليس
=========
للمُلك على شط الفُرات أناشيد
وشعور بليد
من رؤيتك وانت على الفَرَسَه
قابض على الفرصه
ودم أهل البيت فى ايدك .. يا يزيد .
ياهل ترى يامعاويه ..... لسّه سعيد !!
الموت صلاه
من غير حَصير ولا قِبله !!
وابنك بيتجهّز بلبس العيد
لحفل شاى
مع التتار .. على دِجلَه !!
بيهم بيستقوى !!
أحضانهم المأوى !!
وسبحة التقوى !!
والخمره والتهليس
وركعتين يشفعوا له فى مقام إبليس .
يامعاويه لا سمعاً ولا طاعه
ماغشنيش منظر قميص عثمان على الشمّاعه
العَدل فِطره .. مش مزاج .. ولا كيف
لاهو .. ميزان .. وكفيف
ولا بالمصاحف تحت حَد السيف
يامعاويه لاسمعاً ولاطاعه
يسقط يزيد
يسقط يزيد
يسقط يزيد
البَيْعَه .. متباعه
ودم إبن النبى
مش بس عند الغبى .. إبنك ..
ده فوق إيدك .
حالاً تقابل بيه سيدنا النبى وسيدك
إزّاى يرحب بيك
وتزوره .. وتعُودُه ؟
تعطش .. وتشرب مَيَّه من حوضُه ؟
إغسل شفايفك م الدما .. وكبّر
وبكل طاقه إدعى .. واستغفر
إدعى يكون لك توبه .. مقبوله
راس الحسين !!!! عن جسمه مفصوله !!!!!
وابنك فى قصره ..
فوق سرير الدم !!!! .
بين الجوارى ساهى مش مهتم !!
يدخل عليه الجنود
من قوم عاد وثمود !!
النصر ف عنيهم
والدم ف إديهم
يقدموا راس الحسين .. والأهل !!
يشمت .. شماته ماشوفتهاش ف أبو جهل !!
يسمع أغانى المهرجان والراب
ويدعى كل الأهل والأحباب
يقتل ضيوفه
ويشنق الأبواب .
تعليقات
إرسال تعليق