وجعتيني للشاعرة سماح مشعل
وجعتينى
ولما بقول وحشتينى
ماهيش محتاجة انا احلفلك
ولا بربى ولا بدينى
كفاية ابص فى عنيكى
وبالتأكيد هتقرينى
وقبل مااقولها تقوليها
وحشتينى
ماهو الاحساس ماينفعشى يكون تزوير
بدون تبرير
لكل البعد والمسافات
وطول الحزن وسكوتي
بدون جوابات
ولا الازمه اللي عدتها
ولا المحنة اللي خطيتها
ولا لكونك في تكويني وحشتيني
لأنك دم فى عروقى
وحلمى وسكتى وشوقى
ودوشة فكر ف هدوئي
وحشتينى
ده انا اول جواب وصلك
واول سطر فى الاحلام
ده انا اول حبيب حضنك
وحرمتك عنيكى تنام
واول دمعة بكتيها
واول حد داب فيكى
مايكفيكى عشان يكفى تعاندينى
وحشتينى
جرالك ايه بقا فوقى
ده كل الدنيا مش عايزة تكون جنبى
ف ساعدينى
ده انا بعدك ده كاوينى
وانا نفسى أجيب لك م السما حته
ومش طايل من الأحلام دى غير مترين
بمدد فيهم الجته
وما املكشى واهى جيوبى
ماهيش مليانة غير شوقى
وفكة لكلمتين حلوين
وحتى الحلم مش عايز يطمنى وبيجينى
كابوس فى منامى يقسمنى بانك فجأة سبتينى
ف كان ممكن شيطانى يقل من عقلى ومن دينى
وابيع السم للتايهين وتلقى كلبش في ايديه
ويرمونى مع المساجين
وكان ممكن اضيع في طريق مع الضالين
وانط في مركبه عايمه وتبقى الفكره دي هايله
واموت غرقان مع اليائسين ماهيش فارقة
ماانا ميت كلا الحالتين
بعدت وخدت نَفْسى يومين أواسينى
ف حسينى وهزينى ومشى بكفك الناعم على جبينى
وقولى إنك سامحتينى
وحشتينى
#سماح_مشعل
تعليقات
إرسال تعليق