واقفلك للشاعر عادل علي
واقفلك
واقفلك تحت شباكك
بدمعه حزن لفراقك
وأعيش في خيالي بعنيا
يفوت الوقت بعد ساعات
وأحس كأنهم ثانيه
تعالى وطلى في عنيا
يا ماليه الدنيا حنيه
أنا من غيرك
أبقى أنا مين
وروحى تايهه مش فيا
تعالى ومديلى إيديكي
وأعيش العمر في عنيكى
أنا من غيرك
أبقى انا مين
ياعمري بعمرى أنا شاريكى
ده حبى ليكى حاجه تانيه
يا أحلى سعاده فى الدنيا
تعالى فى حضنى لو ثانيه
وضمينى بحنيه
ونسيني اللي راح مني
وكل قريب غريب عني
تعالى نعيش حياه تانيه
بابص كتير علي الشباك
على أمل انى أكون وياك
علي الحلم اللي جي هناك
هاشوفك وللا مش هالقاك
هاعيش وأحلم وهاستناك
أنا اللى بادوب كتير فى هواك
دى فرحه قلبى هى رضاك
تعالى نعيش حياة تانيه
ده قمرى وليلى فى عنيكى
وحلم العمر أكون ليكى
انا بتمنى أكون نجمه
تنور ليكي لياليكي
نعيش بحنين وأحلى سنين
وأشبك ايدي في ايديكي
كتير باحلم أكون بسمه
أشوف فرحتها في عنيكي
كتير باحلم ومشتاقلك
تلاقيني والاقيكي
أنا أملي أكون جنبك
تحسي حناني وأراعيكي
بهمس الحب أسمعلك
بنبض القلب بأندهلك
بسيبك بس بارجعلك
ما أنا زيك غلبنى الشوق
أنا كلى أكيد منك
باسيبك بس قلبي معاك
وبأحلم تاني يوم ألقاك
بكل الشوق يا أحلى ملاك
وأشوف الحلم في الشباك
ونظره حب من قلبك
عادل علي
تعليقات
إرسال تعليق