اتعودت عليه للشاعر محمود الحريري
"اتعودت عليه"
إهداء إلى صديقى العزيز
وشاعرنا القدير
أ. اسماعيل عبدالهادي
----------------------------
حبيته ودُبت ف حبه
واتعود قلبى عليه
وشبكني برمش عيونه
وبقيت انا ملك إديه
والحب باين ف عنيا
مَقْدَرش ف يوم اداريه
د انا روحي عليه بتنادي
ومشاعري تِحِن إليه
مش ممكن أبعد عنه
أصلى اتعودت عليه
*******
يعني عشان عارف إنه
من أجمل خلق اللَّٰه
يشتري ويبيع في العالم
وكمان مش فارقة معاه
يتقل ويزيد في دلاله
وعايزنى أَلِّف وراه
طب ليه بيعذب فيا
مع إني بادوب في هواه
وغرامه بيجرى ف دمي
وف ليلى بافكر فيه
مش ممكن أبعد عنه
أصلى اتعودت عليه
********
ياحبيبى بلاش تتعبني
ولا تتعب قلبى معاك
د الشوق والله غالبني
واتمنى أعيش وياك
وغلاوتك بتزيد عندي
مهما بتعمل باهواك
إياك تبعد عن عيني
دانا بعشق ضى عنيك
مش ممكن أبعد عنك
أصلى اتعودت عليك
------------------------------------
بقلمي..م/ محمود الحريرى
تعليقات
إرسال تعليق