كنت فين ياشعر للشاعر كمال قطب
كنت فين ياشعر لما الحب هاجر
في دروب المغرمين بعد العصاري
كنت فين والشمس بتلم الضفاير
من ضلوع الموجة في أخر نهاري
كنت فين وانت ف جرابك ألف حاوي
ألف رحلة وألف ضحكة وألف صورة
ألف معنى منتهى الحسن اللي هاوي
لمّا يغمز للقمر يحدف غناوي
لمّا يهمس ليلي بيبعتر نجومه
ف البراح من غير جناح طايرين يحومو
كلّ مرة تختلس للبوح منارة
من عيون بتزف قلبك سحرموجة
وانت بحرك رغم سحرك ناقصه هوجة
توصف الأحوال بكلمة ود عوجة
حتى لو من ساس مشاعر حسن نيه
نفسي ترجع تبني ليا بالمعاني برج عاجي
كل نوره من سطور البوح يساعني
كل همسه تعكس الضي ف سراجي
بس إنت كل ما احتاجك تبيعني
أوبتهرب من هوايا ف ليل مزيف
أوبتقصد تختفي باسم التصوف
لسه نفس الرغبه تعشق في التسوُّف
عشق زاهد عشق جني
عشق بيتوهني مني
عشق جايزغصب عني
بسّ لمّا الظن يحدف شوكه بسأل
كنت فين ياشعر لما الحب هاجر
ف الدروب المجهدة بعد العصاري
فالإجابة تبقى ضحكة
تبقى غمزة تبقى يعني مش إجابه
غيرش إن الصمت جاري
والمشاعر في المكامن حرف آوي
...............
كمال قطب
تعليقات
إرسال تعليق