خلي بالك للشاعر المبدع مجدي حسن

 قصيدة/ خلّى بالِك

روحى ارتاحِت لروحِك وعشقتِك ياقمر

ودا كان منغير ما اشوفِك

لحدود وجواز سَفر

ياما عيون شُوفتها لكن ما عشِقتهاش

وعينيكى عشِقتها مع انى ما شوفتهاش

قلبى كان انتهى وف لحظه معاكى عاش

منغير نظرات عينين منغير لمسات ايدين

بعيش وياكى قصه تحكى عنها السنين

هنعيش الحُب جنّه تِملا السما والأرض ويكون كل اللى بيننا كلام وحروف كيبورد

وتتقابل قلوبنا على جناح الحروف

روحِك ليلاتى عندى روحى عندِك تطوف

رجّعتيلى الحياه نَبض القلب وهواه

علمتينى احِسّك وكان احساسى تاه

بنصون كل العهود احساسنا ببعض واصل

وادعى يلغوا الحدود وتتلغى الفواصل

دايما بعيده عنّى واقرَب لنفسى منّى

صباح المسك والعنبر صباح احلى من السُكر

صباح خلّا الوجود كُله بنورِك يصحا وينوّر

قصة حب كبير وخلود وكأن مافيش بيننا حدود

ولا يوم نِسأل ايه آخرتها

مالهاش آخر ودى حلاوتها

اوعدِك روحِك وروحى يكتبوا اجمل حكايه بس خايف يوم ياروحى القا روحِك مش كفايه

ليل نهار بتكلمينى لمّا لحظه تدمنينى

تتعودى وجودى ف حياتك وتصدقى حُبى لذاتِك

عارفه هقولِك ايه ياحياتى انتى بقيتى زى مراتى

واسألك ازاى فى بُعدى بِتقَضّى يومِك

وبتلبسى ايه وانتى  صاحيه ووقت نومِك

واللا اقولِك ابعتيلى ڤيديو ليكى تكونى فيه منغير هدومِك

ان قِبلتى اكون مسِكت عليكى حاجه وانتى عارفه ان الشرَف اهم حاجه

تفتكرى ايه لحظتها هتكون الظروف لمّا يتحوّل نهارِك رُعب اوليلِك لخوف

وان رفضّتى بضَغطه منّى تنتهى بيننا الحروف

كِلمه ومن قلبى بقولهالِك

خلّى بالِك خلّى بالِك

شعر/ مجدى حسن