سفينة نوح لجناب المبدعة الشاعرة فاطمة علام
(سفينة نوح)
★★★
لساك عايش ليه أوهامك
وف موتك شوفت خلاص للروح
لساك متشعلق فى حبالك
مش دريان إنك مجروح
ليه تهرب وتسد ودانك
من كلمة حب بتسمعها
جيالك من صوت مبحوح
بيقول هاجر بره حدودك
وإنسي الماضي وبطل نووح
ريحة الموت بتقرب منك
جوه تابوت قلبك بتفوح
الموت خاصمك مبقاش عايزك
لم رفاته وقال هيروح
إوعاك تستسلم لأوهامك
إلحق وإركب مركب نوح
أصرخ
غني بأجمل غنوه
ألبومك ف الهوي مطروح
إعزف شعرك على أوتارك
أنا قلبى زيك مجروح
أخرج بره كهوف أحزانك
أوعي تبطل أبدا بووح
عيش دنياك وإرسم أحلامك
مد الخطوه ودوس أحزانك
مُر لبكره وعدي وفوت
قطر أمالك ودع أمسه
بيزمر بيقول توت توت
إرمي أوجاعك إبعد خوفك
وإقتل همك بالنبوت
قوم وأروي الأرض العطشانه
يطرح أملك فرح وشوق
وإمحى ظلام الروح جواك
بعد الضلمه بيجي شروق
بالحب هتحلو الدنيا
ومسيرها مع الصبر تروق
#فاطمه علام #
تعليقات
إرسال تعليق