عصر الفرسان للمبدع الشاعر مجدي حسن
قصيدة/ عصر الفرسان
ايوا حاسه انى بَحبَك من سنين
انتَ ابويا واللا اخويا واللا مين
انتَ ابويا بتحمى قلبى بحكمتَك
واللا اخويا واللا صاحبى وصاحبِتَك
واللا عاشق دوّب القلب ف حنين
قوللى مين انتَ مين
حاسه بيك وبحنيتَك خوفَك عليّا
وبعينيك وبنظرتك تسحِر عينيا
يعنى من كل الوجود انتَ اللى ليّا
انتَ فرحة كل عمرى والسنين
وبشوفَك عصفور على كفّى بتقوللى من الحُب اسقينى
وأسد دايمآ تحمى عواطفى م اللى يقرّب جَنب عَرينى
لمّا نِسهر بَس يحلالى السهر
والقا نور الشمس مع ضَى القمر
بيننا صوت الهمس كروان ع الشجر
والقا روحى وقلبى بيك مطمنين
قوللى مين انتَ مين
ايوا عارفه انى بَحبَك بس نوع الحُب ايه
وانى ساكنه جوّا قلبَك
وانتَ قلبى سكِنت فيه
يعنى عشقاك من زمان
حضن يدينى الأمان
لو فى قُربَك واللا بُعدك حُب عُمره ما يبقى كان
لمّا احس انك حبيبى واللا اقول
تبقى عندى ياحبيبى كل دول
تبقى ابويا وحكمته ليّا الوتد
تبقى اخويا وقت ضعفى تكون سند
تبقى عشقى تدوب وادوب فيك للأبد
مهما نِكبر نلقا بعض صغيرين
قوللى مين انتَ مين
بحلم دايما واتمناها
ايوا اتمنى ف يوم الاقيه
يجمع كل صفات حبّاها
يحلم بيّا وأحلم بيه
ايوا كتير بَحلم بالفارس واصحا كأن الحلم ما كان
يبقى لبسمة عمرى الحارس واللا انتهى عصر الفرسان
شعر/ مجدى حسن
تعليقات
إرسال تعليق