وايه يعني ياعصفورتي للشاعرة شيماء أبوسمرة
## نص جديد##
وايه يعنى ياعصفورتى
اقولك سر خبينى
واقول للورد متفتح
خلاص فتح على عينى
واوشوش كل حتة شوك
بلاش تتغرى وتجينى
وتحيينى فروع من شجرة
الصفصاف
انا اصلا ف ضلى بخاف
اقوم افرح يجينى الحزن
اعيش واركن ف بكرة الحضن
واداوى بضحكتى استهلال
ودور العازب الاعمى عن الحق
اللى عاش خيال
بلاش تحتال ياوجه صبوح
على مرايتى
وتقنع فيها انى هعيش
وتتحايل على صورتى
تحط الورد من خدى
وتسحب عطر من عندى يادوب
تناتيش
وانا لسه يادوب بصحى ..
ولسه بهد تمثالى ف جوة النيش
فانا محفوظة من مدة
وانا ملحوظة مش قعدة على سطر الكتاب من فوق
ومستنيه شمس تطل عليه ..وبس تهمسلى دة.بكرة تروق
فيمكن افوق على ايدها
والف الخصر من طعم الحياة
عنبى ...عناقيدها
وسيد سيدها ...تفاؤل قال
هجيب احزانك الفضى ...عشان
تتشال
وهمسح فيها من كفى
وهتخفى
وهتشفى الفرح عالحيط
وتبقى خريطة للدنيا...
وخطة فرح ربانى بدون تخطيط
ومش محتاجه للتظبيط
غير اللقطة اللى فوق سطح
الجمال بتشب
وغير خطوة بكعب العفه لو عالى ... ناقصله يدب
واصغر مضغة تحيينى ...
اكيد القلب .
ساعتها يمكن اتلحلح واتنحنح
وانا داخلة على عتبة سعادة بجد
ويمكن انسى ان الحزن بقالى الفرض ....
ومش شرط انى ادخل جنتى
استحياء
ولا ابنى سفن احلام ...ودمى
يبقى ليها الماء
فمايكفينى ...يهدينى .... ويرضينى اكون شيماء
٣-يونيو -٢٠٢١
#بقلمى ...شيماء ابوسمرة
تعليقات
إرسال تعليق