عيشي اللحظة لجناب المبدع الشاعر مجدي حسن

 من ديوانى/ قلب شاعر

قصيدة / عيشى اللحظه

وبتسألى فى الجاى ليه..منا ياما طمنتك عليه

هنعيش دايماً فى قلوب بعض..عندى سؤالى وعندك رد

خايفه منى واللا خايفه عليا..واللا خايفه م الليالى الجايه

كنتى قبل لقانا ايه..وانتى بعد لقانا ايه

كنتى تايهه زى ريشه فى الهوا..جوا حضنى عشنا أحلامنا سوا

ليكى عاشق م الهوا بيخاف عليكى..ايوه عاشق جوا قلبه بيداريكى

بعد غربه عشتى فيا وعشت فيكى..وف عيونى سكنتى وسكنت ف عينيكى

من زمان ايوه شفتك من زمان..من زمان واسمى واسمك ع الحيطان 

منقوشين بالنور فى جدران المعابد..ع المسلات والكنايس والمساجد

يعنى ارواحنا البريئه..من زمان عاشوا الحقيقه

عاشوا قبل لقانا بآلاف السنين..صانوا سر هوانا والشوق والحنين

حب اكبر من حياتنا..حب مخلوق جوا ذاتنا

شوق ملينا بينادينا..للى جاى وذكرياتنا

تكبرى يكبر هوانا..تسهرى يسهر معانا

عيشى اللحظه معايا..بنعيش احلى حكايه

ليه هنفكر ف اللى هيحصل..ومافيش بيننا نهايه

اوعدك هتكونى جنبى..انتى وعيونك حبايبى

حب بينور شموعنا..وبإيديه يمسح دموعنا

لو نغيب عن بعض لحظه..حبنا يضمن رجوعنا

شعر /مجدى حسن