براءة الياسمين للشاعر المبدع مجدي حسن
قصيدة / براءة الياسمين
الوم على مين ومين
ضيعلى اغلى سنين
ومين اللى اغتصب طفله.
فى عز براءة الياسمين
انا بنوته ببدأ لسه سنينى الاولى
تحت التوته بلعب مع صحباتى الأوله
قلت لابويا جِبلى عروسه
لكن ابويا جابلى عريس
قاللى تعيشى معاه محروسه
خلينا نفرح ونهيص
وانا صدقت وعشت الفرحه
اصلى فرحت بكوشه وطرحه
طبعا ابويا عايز راحتى
منا مش عارفه ايه مصلحتى
يعنى فى سنى ازاى اختار ورمونى من جنه لنار
ياللا يابنتى هاتيلنا حفيد
يملا حياتنا شموع بتإيد
بعد شويه ومش بإيديا
جبت الواد والبنت وراه
من انسان انا مش حاساه
ولا كان يسمح سنى أفكر انا عايزاه او مش عايزاه
كل سنينى معاه بتألم
ولا سمحولى اشكى ولا اتظلم
ولا سمحولى أقول الآه
وبقيت أنا مش هى انا
وكأن عمرى ميت سنه
مسؤوله عن بيت وولاد
وانا محتاجه مسؤول عنى
بينى وبين الفرحه بلاد
مين حاسس مين يسمع منّى
ضاع العمر اللى ماعيشتوش
تكفير ذنب انا ماعملتوش
بالقبول والإختيار
الجواز شمس النهار
واما بيكون قبل وقته
يبقى نار مابعدُه نار
قبل ما افكاركوا تموتها
خلّوا البنت تعيش طفولتها
هتضيع وتضيع منها حياتها
ايوا حقيقه ودى آخرتها
شعر/ مجدى حسن
تعليقات
إرسال تعليق