جحا للشاعر المبدع مجدي حسن
قصيدة /جُحا
تيجى نتجوز
واللا هتقعد جنبى مبوّز
لابس شورتك الكاروهات
وفانله قديمه بفتحات
تحسب مصاريف الأولاد
بس يابت وبس ياواد
وبتحسب ف اقساط العفش
تيجى تسدد مابتعرفش
بماهيه مركّبه جناحات
وتقول كل كلامكم هات؟
أو ع النت تكون مشغول
لابتسمعنى ولا بتقول
وياريتك هتكون مسئول
بتكلم مززك على طول
واما هقولك كلمة حب
تسخر وهتضحك م القلب
بعد هوانا وعشقك ليا
تهرب م القلب الحنيه
وهترجع بيتك ياعينيه
تلاقينى لابسه الجلابيه
على راسى شاده التعصيبه
والبيت بطبيخ ريحته غريبه
عاقده الطرحه ودايما فاصله
وف ايدى سكينه وبصله
لا ياحبيبى بلاها جواز
خلينا على بعض عزاز
يبقى هوانا سمانا وبيتنا
نبقى اتنين والحب تالتنا
وافرح دايما بابتساماتك
وأنور بجمالى حياتك
تبقى ثوانى لقانا لذاذ
واِعرف جحا سألوه قال ايه
ع اللى عملها من قبليه
واللى ماخدش برأيه وسأله
راح وعملها من بعديه
عارفه جوازنا بيكون سُنّه
لكن اصعب شئ فى زماننا
لما نعيش خايفين من بكره
نهدى الفقر ميراث لعيالنا
شعر/ مجدى حسن
تعليقات
إرسال تعليق