ألوان الحب للشاعر المبدع مجدي حسن

 قصيدة/  الوان للحب

مش هحتار ولا هختار

مش محتاج ولا لحظه افكر ولا أوصل لقرار

بين الأم وبين الزوجه

الخالق علمنى اختار

وصانا عليهم فى شبابهم وصانا لو همّ كبار

انتى بعيش جنبك واتهنى

وامى تحت قدمها الجنه

انتى بتاخدى وامى بتدى

وابقى معاكى وتِقبل بُعدى

مش هتحمل نظرة حزن

فى عيون أدفى واجمل حضن

بكرا تكونى زيها ام وابنك حُبه يدوب فى الدم

بعد ماتِشقى وتربّيه

بإيديكى لغيرك تِهديه

لو تشوفيها وهى بتدى

كنتى فهمتى كلمة ام

لحظات ضعفى ولحظات مَرَضى تصحى فعز الليل وتضُم

هفضل احاول رد جميلها

ياما شالتنى ولازم اشيلها

ولولاها ماضحكِت اوقاتى ولا يوم كنتى هتبقى مراتى

امى هتفضل حُب حياتى وبقولهالك من اولها

وانتى يا امى جاتلك بنت

حُبها زرعُه فى قلبى الله

لو قدامى او يوم غبت

عامليها بما يُرضى الله

مش هتكون ولا لحظه مكانك

اسقيها عطفك وحنانك

دايما حاولى تكونوا صحاب

ام وبنتها مش اغراب

تبقى سمانا رايقه وصافيه وبلاش تبقى غيوم وسحاب

لون م الحب ولون م الحب

انتوا اتنين فى العين والقلب

هى العشق وانتى الحب

وصّانى عليكم الرب

شعر/ مجدى حسن