زمن العاشقين للشاعر مجدي حسن

 قصيدة/ زمن العاشقين

بين الماضى وباقى سنينى اعمل ايه

عشت سنينى وقلبى ناسينى وكنت ناسيه

كنت اتمنى لقانا يكون

قبل ما اقابل اى عيون

كنتى تكونى اول انثى اللى معاها اعيش واكون

كان القلب يطير فى سماه وياحبيبه تكون ساكناه

تبقى الدنيا غير الدنيا لما القلب يعيش لهواه

ايوا قابلتك بعد سنين

وانا عطشان اشواق وحنين

وانا محتاج دايما وبدوّر وبقول فات زمن العاشقين

قبلك انا رتبت حياتى بعقلى وبس

ونسيت قلبى ونفسى وذاتى وعشت ف يأس

انى فيوم هعشق واتحب واسمع دق ونبض القلب

خايف اقول خليكى بعيد    اتوه منغيرك

واللا تكون الايد فى الايد  واجرح غيرك

اول مره اعشق وبجد

والقا الروح تهوى وتتشد

عقلى يقوللى لازم نبعد قلبى يقوللى نعيش مع بعض

كنت بعيش ايام وخلاص منغير لاحبيب ولا احساس

فجأه قابلتك روحى

نادتلك

عندى بقيتى اغلى الناس

انا محتار بين عقلى وقلبى اطاوع مين

انسى و اكمل عمرى حزين واللا ادخل زمن العاشقين؟

شعر/  مجدى حسن