اعجاب للشاعر مجدي حسن
قصيدة/ اعجاب
حبيب القلب مالُه مثيل
فى صدق الحب والتمثيل
فى عز ما اكون انا جنبُه
بيحلف ساكنه فى قلبُه
تعدّى غيرى من جنبُه
عيونُه تقول لها ياجميل
معايا بكل وجدانُه وعايشه
العمر علشانُه
لكن عيبُه يشوف غيرى
تبدِّل عقلُه بِجنانُه
ويرجع تانى يتأسف
بعشقى وحُبّنا يحلف
وبيقول الزهور الوان
وغيرى مالوش فى
قلبُه مكان
سَبب غيرتى واحزانى
وغيرُه ماليش حبيب تانى
وعارفه انُه بيهوانى
وعايش عمرُه علشانى
اجدد لِبسى والبسلُه
واغنيلُه وأرقصلُه
كتير غيّرت من نفسى
وبيشوفنى بشكل جديد
وبيخرّجنى من يأسى
ويفرح بيّا فَرحة عيد
واحاول اكون كفايه عليه
وستات الوجود فى عينيه
لكن تانى بيتغيّر واعجاب
العيون يظهر
بغيرى لو فى اى مكان
عيون خضرا وشعر اصفر
وبتزوغ عينُه للألوان
ولِبس يشف ويصوّر
وتانى يشغِلُه المظهر
وينسى الأصل والجوهَر
شعر/ مجدى حسن
تعليقات
إرسال تعليق