بطل العالم للشاعر مجدي حسن

 قصيدة/ بطل العالم

بطل العالم فى الحوارات وكلامه زى الشربات

يبنى يهد ووقت الجد ابقى الريح وحبيبى بلاط

بيقوللى حبيبتى عروسة بحر

 نظراتك ليّا اقوى من السحر

وحوريه من السما نزلالى لو أدفع عمرى عشانك مهر

بيرص كلام يبنيلى قصور ويبدل عتمة ليلى بنور

عيشنى معاه حلم بفرحه

وحلمت معاه بكوشه وطرحه

يتكلم عن صوتى وشَعرى

عن احساسى ودفئ مشاعرى

واجرى بسرعه عشانه انام

وبنتقابل فى الاحلام

بنتعلم     سوا نمشى ونتكلم

ساعات نفرح ساعات نبكى ونتألم 

ورضيت وياه بكتير احزان ولا بسمح دمعة عينى تبان

ما انساش ولا لحظه قضيتها معاه

وحبيبى ليه طبعه النسيان 

بيقرب دايما منى وكأنه ما بيقربش

وبيسأل دايما عنى وكأنه مابيسألش

مش عايزاه بس معايا

 عايزاه دايما جوايا

اتنفس نفسه واهمس همسه بس ازاى ما اعرفش

مش حب طبيعى داحب جنان

ولا ابيض واسود ولا الوان 

عيشنى معاه اجمل احلام

وصحيت وكأن الحلم ماكان 

يوعد يخلف يكدب يحلف

وبكلمه واحده يقولهالى

 بيخلى الايام تحلالى

وارجع واصدق من تانى فى وعود وكلام زى الشربات

ما هو بطل العالم فى الحوارات

شعر/ مجدى حسن