حكم نهائي للشاعر مجدي حسن

 من ديوانى شريط ذكريات 

قصيدة / حكم نهائى

خلى باب الشوق موارب وقت شوقنا نمُّر فيه

مهما نتغرّب حبايب واللى بيننا هنشتهيه

قوللى بُعدَك عنى هدنه واستراحه للمحارب

الفتور هدد وجودنا بس هنكمّل حبايب

لا متحرقش القوارب سيب فى بحر الحب قارب

بعد ما تهجر بر هواك ترجع بيه على بَرّك تانى

وهكون دايماً بستناك لا ف يوم هنسى ولا تنسانى

انا بشكيلك منّك ليك كل مافيّا اشتاق لعينيك

لا الطوفان يقدر ياخدنا ولا الفراق لغرامنا غالب

سيبلى شمعة ضوء فى عتمه يوم تدل على الطريق

سيب فى وسط سكاتنا كلمه لو عطشنا تبل ريق

ايوه تملّى بخاف من بُكره وانتَ بعيد عن عينى

خايفه هوانا يصبح ذكرى حُبك بيقوينى

دا اللى يحب مايعرف يكره حبك داب فى سنينى

حكم نهائى ؟بتقول بُعدك حكم نهائى!!

حكم نهائى واعمل ايه فى عذاب اشواقى

حتى لو حكمك نهائى ليّا حق استأنفه

لحن حبى لسه باقى لسه قلبى بيعزفه

يمكن الاشواق تنسينا الخصام يمكن ابدأ واللا تبدأ بالسلام

يمكن اعرف وانت جنبى تانى اطمن وانام

لو كان بُعدك حكم نهائى انا من حقى عليه استأنف

ايوه هدافع عن اشواقى ايوه هروح لعيونك واحلف

هحلف بدموع وابتسامات واللى ما بينّا كلام وسُكات

ياما سهرنا نناجى قمرنا ياما رسمنا قلوب فى شجرنا

ياما عدّينا نجوم فى سَهرنا واتعذبنا كتير واحترنا

وانسى ف ثانيه كل الدنيا لما ليلاتى ف حضنى تبات

حتى عيونك شاهده عليك همس  شفايفك لمس ايديك

ارجع رجّعلى ابتساماتى هتضيع وتضيعلى حياتى

الحياه فى الوحده بارده وانتَ جرحك من نصيبى

مهما ينزف جرحى هرضا   سيبلى نقطة دم واحده 

تترسم على شكل ورده اهديهالك ياحبيبى

شعر/  مجدى حسن