دعوة للحب للشاعر مجدي حسن

 قصيدة /  دعوه للحب

تيجوا نتعاهد اللى يكونلُه حبيب يخلصلُه

واللى مفارق واللى اتباعد يرجع تانى ويحفظ وصلُه

تيجوا نتسامح تيجوا نتصالح

ونرجّع احساسنا لأصلُه

نحيى الحب ف عيد الحب

نحضن اوى سكان القلب

ياللا نفكر ازاى نخلِص

فى زمن فيه الاخلاص صعب

نزرع فى الروح بزور

تطرح صدق وفا

تصبح عتمتنا نور

وبرد الروح دفا

ومانقولش الزمان

بيخلى الحب كان

ونعيش العمر دايما

مدفينا الامان

مش عيد حبيبين وبس

مش عشق اتنين وهمس

خللوا العيد السنادى

بالفرحه قلوب تحِس

ياللا نحِب الحياه

ارض العمر وسماه

تصبح دموع عيوننا

فرحه وماتكونش آه

تعالوا م الليلادى

ننسى كلمة خصام

نلغى كلمة نعادى

ونبدأ بالسلام

نلغى الناى الحزين

من دنيا العاشقين

وتكون نبضات القلب

اغنيه لعيد الحب

شعر / مجدى حسن