دموع للشاعر مجدي حسن
قصيدة / دموع
مِش دموع مِش دموع
اللى شايفو فى عينى مِنَك مِش دموع
مِش بُكا على ذكرى بيننا وقلب يحلم بالرجوع
كنت مِلكَك وبسذاجه
كنت بَديك كل حاجه
عُمرى ما اتحمِلت تعطَش او تجوع
تعطَش اسقيك من حنانى
وانتَ مش عايش عشانى
واما كُنت مِنّى تشبَع
تلقى غيرى ليه تجوع
مِش دموع مِش دموع
دَمعه بَغسِل بيها عينى
لمّا كانت حاضنه صورتَك
وقت عاش قلبى لحنينى لمّاكان ينبض بسيرتَك
كل لحظه عِشت ليها
قبل ما اكشِف يوم خيانتَك
هو دا الحُب الحقيقى؟
تزرَع الحُزن فطريقى
كُنت اقول لنفسى يمكِن
الحنين بيرجَعَك
واكتشفت انى المُسَكِن
لماغيرى توجَعك
حضنى كان دايما امانَك والدفا
حبى كان دايما لأوجاعك شِفا
عقلى يتخَدّر بكلمه تِبقى نارَك أحلى نسمه
شوفت عتمِة ليلى جَنبَك
ضيّها كلمة احبَك
كنت خايفه يوم تغيب شمسَك عليّا
واللا نظره من عينيك ماتكونش ليّا
واللا يوم وسط الطريق حتسيب ايديا
مش حندم ولا اسلِم ولاهحكى ولا اتكلِم
اللى عليه العِشره تهون
واللى بيخدع واللى يخون
لازم يوم يتألم
كِبرت طفلِتَك وفِهمت لعبِتَك
لا انا حقبل تِبقا سيدى
ولا هبقى جاريتَك
كان حُب غالى وانتَ رخصتُه فعينيا
ونسيت ليالى كنت عندى الدنيا ديّا
شوفت مِنَك ياما قسوه
واكتشَفت انَك ماتسوى
دَمعه واحده تكون عشانك تطفى فى القلب الشموع
مِش دموع مِش دموع
اللى شايفو فعينى مِنك مِش دموع
شِعر / مجدى حسن
تعليقات
إرسال تعليق