الى القدس للشاعر المبدع اسماعيل عبد الهادي
دويتو بين أم وابنها بعنوان .......
...*( الي القدس )*...
الأم :
الشمس غابت والليل فرد
لساه ما عاود الولد
قلبي عليه داب وانفطر
خايفه عليه لينجلد
انت ياولدي دلني فين
فين راح حشايا والكبد
ميكونش تاه وسط الديابه
والا اندفن تحت الهدد
الأبن :
يام الولد اصل الولد
معدش يامه اسمه ولد
ابنك يا غاليه لملم هداده
وراح للقدس بالمدد
ابنك حلف بدم الشهيد
ليرفع راسك في البلد
قام الولد ساب البلد
والفجر لسه بيتولد
شمر سواعده يستني بكره
بعزيمه صلبه كما الوتد
شاف ع الحدود أبناء عموم
وبيهم أهو زاد العدد
سايبين بلادهم وأهلهم
الواحد فيهم ب١٠٠ اسد
ع القدس شدين الرحال
والقلب مع الضهر استند
الأم :
ومنين ياولدي السلاح منين
دول ياولدي حبة صغار
عودهم ياولدي لسه أخضر
لسه بدري د المشوار
واليهود هما اليهود
صهيوني وقاسي وغدار
قتلوا خالك وابوك وعمك
وقالوا كمان خالتك ازهار
عايزاك ياولدي تروح ل اخوك
قبل م يخلص ده النهار
وتروحله جري ع الحدود
لجل ما تقيدوها نار
عايزاك كمان تاخدلي تاري
م السفاحين تجيبلي التار
الأبن :
وحياتك. يام الغاليين
راح ترجع ارض فلسطين
لا انا راجع ولا اخويا ح يرجع
وبعلم الأقصي رافعين
ح نفكرهم بعصر الصحابه
ح نصحيلهم صلاح الدين
مفاتيح القدس ح ترجعلك
ح نعيد امجاد يوم حطين
ويرفرف علي يافا علمنا
ع النصر ياغاليه ناويين
عايزك تحكي لكل جيرانا
وقوليلهم الشمس حتطلع
مش ح تعيشوا ف الذل ده تاني
وعيونكم ابدا م تدمع
وقولي ولادي جابوا ارضي
لجل أما ولادكم تزرع
وبأرواحهم صانوا عرضي
بكره ولادي في ولادكم ترجع
**************
بقلمي/ اسماعيل عبدالهادي ابوالعلا
تعليقات
إرسال تعليق