اسمعي للشاعر مجدي حسن

 قصيدة / إسمعى

إسمعى 

لسه عندِك فُرصه تانيه تِرجعى

قبل مانقول المشاعر بيننا كانوا

قبل قلبى ماينسى حبى

وتتقفل بعدِك ببانُه

لسه عندِك فرصه تانى تفكرى

مين هيسهر ليكى ولمين تسهرى

وليه نمَوّت حلم عِشنا سنين عشانو

مين اللى كان بإيديه بيمسح دمعتِك

ومين فى ضى عينيه

بتنسى غربتِك

مين اللى قالك مش لوحدِك

واللى صان قُربك وبُعدِك 

مين اللى نوّر سكتِك

ومين رسملِك خطوتِك

مش هو انا؟

مش كان غرامنا وحبنا

ايوا آخر فرصه لينا نفتكر اجمل ماضينا

قبل ماليالى الفراق تتزرع اشواكها فينا

اتحداكى

اول همسه واول لمسه تنسى بطلها

واول شمعه ف عتمة ليلِك مين نوّرها

واول كلمة حب ف عمرِك مين كان قالها

تنسى ازاى اول فارس فك ضفايرك

تنسى ازاى الحارس على كل مشاعرِك

كنتى شمسى وكنت ضلك واسألى الايام تقولِك

لو رضيتى بالفراق

بعدى مين حيكون فاضلِك

مش فيلم سينيما وانتهى بكلمة نهايه

واللا رحله كنتى فيها يوم معايا

واللا كلمه تنتهى بيها الحكايه

القمر يطلع لمين

لو يغيبوا العاشقين

كان بيطلع بابتسامه بَعدنا هيكون حزين

شعر / مجدى حسن