غلاف وسطور للشاعر مجدي حسن

 قصيدة / غُلاف وسطور

وبَعدِك مش حقول تانى حبيبة قلبى وحشانى

وحقدر اعيش انا وقلبى وزلزالى وبركانى

ووجع القلب لو نبضُه

يقول سامحها علشانى 

كِتاب وعَجبنى عنوانُه

وشدّت عينى ألوانُه

غلاف يخفى سطور وحروف وكانت زينتُه فى الألوان

وقلب بينكِر المعروف

وبين صفحاتُه بيبانو

اصول الغدر والنُكران

عرفتى تتوهى وتضيعى وكنتى الورد لربيعى

قدرتى ازاى على النسيان وفاكره انى حعيش عطشان

واكمّل عُمرى مع ذكرى

يصاحب غُربتى الحرمان

لكن لأه لغيرِك عندى كام دَقه

لأنى لاعُمرى صدقتِك

ولا اديتِك فى لحظه أمان

وكام نبضَه مخبيهُم

لحُب جديد اعيش بيهُم

مع حبيبه بتتشابِه سطور وغُلاف

ولو فى الحُزن يوم بغرَق تكونلى ضِفاف

حبيبه تكون بتستاهل تعيش العُمر مع إنسان

بيتميّز بأخلاصُه بمشاعرُه وإحساسُه

يصون الحب مهما يكون

ولا يفكّر يبيع ويخون

وعِشقُه سِرّ انفاسُه

شِعر / مجدى حسن