حلم عمري للشاعر مجدي حسن
قصيدة/ حِلم عُمرى
حِلم عُمرى
صفحه بيضا وابدأ اختار السطور
كل كلمه تكون سعيده
والحروف ياسمين ونور
نِفسى اعيش فى دنيا غير
فيها عَدل وفيها خير
نفسى اشوف الابتسامه
دايمه على كل الوشوش
والأرامل واليتامى فى الحياه مابيحزنوش
والفقير حاسس بفقرُه اغنيا مابيبخلوش
والطريق اللى مشيته امشى عكسُه
واما أحلم حلم احقق حلمى نَفسُه
يحيىّ قلبى بالأمل ويداوى يأسُه
مش طريق مفروض عليّا ماشى ومغمض عينيا
وارجع اندم يوم ماينفعش الندم
ويصاحبنى فى الطريق حزن وألم
وتمُر السنين وانا تايه
حزين
لاعرِفت طعم فرحه
ولا تيجى يوم منين
ويدُق قلبى لحُب جديد
حبيبه ف رحلتى معايا
واحس بطعم فرحة عيد
تكون النسمه ودفايا
ولمّا ابص فى عينيها
كأنى بشوفنى فى مرايا
حكاية حُب بسكُنها ودايما ساكنه جوايا
وملهمتى
وبطلة كل اشعارى
وافكارها بتحضن نَفس افكارى
نِفسى يرجَع عُمرى تانى وابقىَ فيه صاحب قرار
نِفسى اشاور ع الأمانى وليّا حق الاختيار
نِفسى اقول يانَفسى توبى تتمسِح صفحة ذنوبى
وابدأ الصفحه الجديده
تبقى بيها الجنه دار
اللى فات م العمر فات
ايه تفيد الامنيات
بَحلم وعارف ان حلمى
حِلم فوق المستحيل
يوم الميلاد لمّا اتكتبلى اتكتب يوم الرحيل
بدأ الطريق من أولُه
وانا ماشى مشوارى الطويل
مرسوم طريق وحكملُه
وانا صابر الصبر الجميل
واللى بَحلم بيه ليلاتى
على اد صبرى وليل آهاتى
ربنا يعوّضلى صبرى
والقا عندُه حلم عمرى
شِعر / مجدى حسن
تعليقات
إرسال تعليق