اختيار للشاعر مجدي حسن

 قصيدة/ اختيار

احساس رهيب

لمّا اعيش الشَك دايما فى الحبيب

وهو جَنبى واللا عن عينى يغيب

شوفتَك بعينى وشوفتها

عينيك بتحضُن حُسنها

وبعدها وبعدها

حاجات كتير لاحظتها

وكتير ناديتنى بإسمها

فاكره كلامك وقتها

مش قولت نَزوه وعيشتها

لكن حبيبتَك هى انا

ساكناك وساكن قلبها

الغيره خلتنى فى نار

والشَك جوايا اتولد

مابقتش عارفه آخد قرار

وبعيش صراع الإختيار

وسعادتى راحت للأبد

لمّا تبقى ف حضنى وتغمّض عينيك

اقول بتتخيلها هيّا

واما توصف يوم عيون سَحَرت عينيك

اقول عينيها مش عينيا

واما احس برعشة الحُب ف ايديك

حاسس ايديها مش ايديّا

حلّين مالهمش تالت

وف كل حَل موتى

انسى العشره اللى كانت

وغرامى وذكرياتى

واللا بغيرتى وشكّى 

أقبل اكمِل حياتى

حاسه انى سمكه ف بحر عشق وتُهت

والميّه فجأه اتسممِت بخداع

أهرب من الميّه انتحِر ع الشط

واللا أموت فى البحر م الأوجاع

شِعر / مجدى حسن