ليلة عيد للشاعر الكبير مجدي حسن
قصيدة / ليلة عيد
تعالى
نحيى ليالينا الجميله
الليلادى ياعُمرى عيد
انسى شُغل البيت لليله
والبسيلى قميص جديد
البسى واتعطرى خلينا نبدأ عيد سعيد
اتعطرى بياسمين وفل
حُطى بودره وروچ وكُحل
ايوا منغيرهُم جميله
بس قلبى الليله محتاج اهتمام
حسسينى باهتمامك
فِعل مش بس بكلام
لسه ماكبرناش ياعمرى
ساكن الشريان غرام
تعالى نفتكر اللى فات
نفتح كتاب الذكريات
نحكى أول ليله بيننا
حققنا فيها الأمنيات
واللى عِشناه فى الحقيقه والخيال
قبل مانجيب العيال
عيشينى معاكى جنه
زى أول ليله بيننا
تعالى ننسى
عمرى وعمرك كام سنه
فى قلوبنا لسه
ساكن غرامنا وحُبنا
بلاش نموت من قبل موت
ايام تضيع وسنين تفوت
مكسوفه دايما م العيال
حد يخجَل م الحلال؟
واحد خرج والتانى نام
والبنت مشغوله بخطيبها
لاهيسمعوا لو دار كلام
ولا أسئله واحنا نجاوبها
ليه مابترديش حبيبتى
م العيال والبيت تعبتى؟
سبتينى بتكلم ونِمتى
مش مفاجأه ومش جديد
بتنامى مِنّى كل عيد
واسهر لوحدى فى السرير
خليها للعيد الكبير
واللا قولك
لسه فى أعياد كتير
كل املى نعيشها غير
تصبحى على الف خير
شِعر / مجدى حسن
تعليقات
إرسال تعليق