أنا الخاينة للشاعر مجدي حسن
قصيدة / انا الخاينه
مش انتَ اللى فهواك
خاين أنا الخاينه
رخِصت وهونت على نَفسى لقيتنى عليك بَقيت هاينه
داريت عن قلبى وعيونى وسَكنتَك شرايينى
وعقلى كان بنُصح كتير يمِد حِبال ينجينى
وكُنت ارفض اسيب البير مهما النار بتكوينى
واشوفَك حُضن حُب كبير يدفينى ويحيينى
وهبتَك كل شئ فيّا
وروحى وقلبى وعينيا
واقول لو ابعِد الفَرحه تروح وياك ومش جايه
تراودنى شكوكى ساعات
لكن أرجَع فى كَفَك ابات
انا الفاكره ومَنسيه
وبَخدَع كل ما فيّا
وتقسى كتير على قلبى
واسمّى القسوه حِنيه
فهِمت كتير ألاعيبَك
وعارفه الغدر كان عيبَك
وعارفه انَك مالكش حبيب
وعارفه انَك فى يوم هَتسيب
لكن ماخطَرش يوم ع البال
أبيع الحُب واسيبَك
عَديت قلبى بعَمىَ ألوان عشان يهواك
وسَكنتَك فى قلبى شيطان
وقولت مَلاك
ومش فجأه ولا مُفاجأه
خيانتَك من زمان باينه
أنا الخاينه أنا الخاينه
شِعر / مجدى حسن
تعليقات
إرسال تعليق