قضية طرد للشاعر مجدي حسن
قصيدة / قَضيّة طَرد
كان بيننا عَهد
وكَتبنا عَقد
أسَكِنَك فى قَلبى
ونعيش حِكاية حُبى
يكون هواك فَرحِة سنينى
واكون دفاك وانتَ تدَفينى
وبَند الأُجرَه إخلاصَك
دَفا مشاعرَك وإحساسَك
تكونلى كل شئ فى الكون
واكون أهلَك واكون ناسَك
كتبنا العَقد كان أُجرَه ومش تَمليك
لايوم تفلِت إيديك إيدى
ولا تفلِت إيديا إيديك
وسَكِنتَك غُرف قَلبى
ودفيتَك فى أحضانى
وغطيتَك بنور حُبى
وخبيتَك فى شريانى
فَرَشت القلب عَرض وطول
شموع وموسيقى هاديه وورد
ويافطَه ف كل رُكن تقول
هنا حبيبين وضِد البُعد
وبَعد ما كُنت تتمَنّىَ
اكون جَنبَك وتتهَنّىَ
بدأت البُعد والأعذار
تغيب عَنّى وأستنّى
بغيرَه وشوق وشَك ونار
بَدَلت الأجرَه من سُكَّر لصَبر ومُرّ
وخُفت بحُبنا أكفَر
واعيش واقع معاك بالأمر
ولمخالفِة شروط العَقد
رَفَعت عليك قضيّة طَرد
لَقيت الدَمع ف عيونَك
بيقول مش بإيدى البُعد
ونبضات قلبى شهدولَك
وقالوا نعيش لأجمَل وَعد
وقبل ماتُصدر الأحكام
صرخت وقولت طَردُه حَرام
حبيبى ماليش غِنَىَ عَنُه
ونسيانى لذنوبُه فَرض
صحيح فى العَقد كان ساكِن
لَكِن فى القلب مالِك أرض
شِعر / مجدى حسن
تعليقات
إرسال تعليق