وفاء للشاعر مجدي حسن

 قصيدة / وفاء 

انا وانتى عَلّمنا العُشاق

مَعنىَ الهوىَ ومَعنىَ الأشواق

ولَغينا من كُل قاموسنا

كِلمة وداع وعذاب وفُراق

اول لمسِة ايد كانت لَمس ايدينا

اول فرحة عيد عيشناها ف ليالينا

اول حُب بِصدق واول نظرِة عِشق اتشافت ف عينينا

وقولتى هعيش العُمر بعاهدَك 

عُمرى ما اسيبَك تمشى لوحدَك

قبلَك عُمرى ما كانلى حَبيب

ولا هيكونلى حَبيب من بَعدَك

واما تبعِد ادعى ترجَع بالسلامه

واما ترجَع اجرى اقابلَك بابتسامه

ومهما طال غيابَك

بكون دايما هِنا

بستنّىَ عند بابَك وبحضُن حِلمنا

ولا كُنت اصدَق ييجى يوم ونقول وداع

ولا كُنت اصدَق ان حِلم العُمر ضاع

وكل احلامى اللى بيكى حِلمتها

النهارده منّى ضاعت كُلها

قولت حبيبتى محتاجلِك

 هكون اهلِك واكون راجلِك

هَكوِّن نَفسى وارجعلِك

ومهما شقيت هجيب مَهرِك

وقولتى حبيبى روحى معاك

انا وقلبى بنستناك

.وراجع اجرى على بيتِك

فى جيبى المَهر ولقيتِك

وواحد غيرى فى الشِباك

شِعر / مجدى حسن