إهمال للشاعر مجدي حسن
قصيدة / إهمال
مع إنى عشِقت عينيكى
وبقيتى شَمسى وقَمَرى
مش هَفرِض نَفسى عليكى
وان عِشت وحيد طول عُمرى
دايمآ بَهتَم بحُبى
مش كل دقيقه بحال
ليه كل كلام من قَلبى
يتقابِل بالإهمال
يمكِن علشان حَبيت
حُب ماعرفوش عُشاق
وبإحساسى اتوَضيت
ودَعيت مانشوفش فُراق
واتأكدتى انى بَقيت
بَتعذِب م الأشواق
احساسى بحُبِك هان
سِكنِت قلبى الأحزان
بتغيبى كتير وتجينى
ولا يوم فكَرت اعاتبِك
ساكنَه ف قلبى وشرايينى
ولا لحظه سكِنت ف قَلبِك
ولقيتنى شويه شويه
بَرفُض إهمالِك ليّه
بَمحى ف قلبى الحنيٌه
ومكانها زَرَعت أسيّه
لا انا هَقدَر على نِسيانِك
ولا واحده هَتملىَ مكانِك
لا هَعيش بَعدِك أتألم
ولا ابكى العُمر عشانِك
هتكونى الذِكرى الحلوه
لأيام عيشتها
لمٌا كان الحُب غِنوه
وعشِقت لَحنها
مَعنَىَ كان لأحلى كِلمه
وف يوم صِدقتها
هتكونى مجرّد ذِكرَى
مابقاش فى القلب مكانِك
مالكيش فى اليوم ولا بُكرا
ولا يوم هحتاج لحنانِك
وكأن الحُب ف زَمَنى
مَعناه غير مَعنَىَ زَمانِك
شِعر / مجدى حسن
تعليقات
إرسال تعليق