أشواك للشاعر مجدي حسن
قصيدة / اشواك
لَنا اول واحدَه زَرَعِت
بَسمه وطَرَحِت دموع
بَدَأت طريق ورِجعِت
بقلبَها مَوجوع
ولا زَرعِت يوم أزهار
وحَصَادها كان أشواك
ما انا قلبى ف يوم اختار
وغَصبنى اغرَق فى هَواك
ولا عاشِت حُب بجَد
وجَرَحها خيانِة عَهد
ولا واحده بتبنى قصور
وف غمضِة عين تتهَد
وايدين بتاخُدها لفوووووق
وتسيبها تُقَع ع الأرض
انا وانتَ ياقلبى ضحايا
للصدق وللوفا
وحلِمنا بأحلى حكايه
حِلم النور والدَفا
مين فينا لحُبُه خان
واللا انتَ خُنتنى
واديت خاين أمان
وبعشقُه ظلَمتنى
ياما كُنت بقول كفايه
أنساه وانسَىَ الحِكايه
القاك دايما فى صَفُه
بحنين تعنِد معايا
مخلوق نَبضَك عشانى
بِتدُق عشان اعيش
خليتُه ليه مكانى
وبَقيت لهواه تعيش
فى غيابُه تتوِجِع
تِفرَح لو يوم رِجِع
واحتار بينَك وبينُه
وآلامى تتسِمِع
وكأن غيرُه مافيش
وكأنى عصفور واتكَسَر
وجناحُه منغير ريش
بتطاردُه أحزان القَدر
هوّا دا الحُب اللى قالوا
عليه حَياه
واللا جَرح ف قَلب
ليلُه نهارُه آه
بس هَقدَر تانى ابيع
قبل ما يروح الربيع
قَبل قَطر العُمر ما يكَمِّل طريقُه
قَبل ما يروح الشباب ومعاه بَريقُه
تبتسِم أيام زمانى
تِصحا فى القلب الأمانى
وابدأ احلَم حِلم تانى
ويّا غيرُه مش معاه
شِعر / مجدى حسن
تعليقات
إرسال تعليق