حلم مختلف للشاعر مجدي حسن
قصيدة / حِلم مُختَلِف
مُشكلتى دايمآ
انى مش بَعرَف أحوَّر فى الكَلام
ولا بَعرف اكدِب أو انافِق زَيّكُم
لكنّى عايش فى الحقيقه وفى المَنام
وحِلمى دايمآ مُختَلِف عن حِلمكُم
انا مش صَنَم
ولا يوم بيسعدنى لَقَب
أصحاب هِمَم
أو حالتى يوم تِصعَب عليكُم
واشوف دموع شَفَقَه ف عينيكُم
وتقولوا مَسكين اتظَلَم
خلَقنى رَبّى بحِكمِتُه
ناقِص حاجات
زايد حاجات
وادانى عقل اكبَر كِتير من عَقلكُم
يمكِن ما بنزِلش الملاعِب
ولا كُنت يوم فى فريقوا لاعِب
لَكنّى بتفَرَج كتير على لِعبُكُم
سَعيد حقيقى انى اتخلَقت مُعاق
بقلب خالى من طَمَعكوا ومَكرُكُم
إنسان بَسيط عارِف حدودى
دايمآ بدافِع عن وجودى
وبحاول اثبِت للحياه
إعاقتى فَضل من الإلَه
وان الاعاقَه مش اعاقِة جَسَد
ولا طِفل أبكَم أو كَفيف اتوَلَد
لَكِن الإعاقه تِبقىَ قَسوِة قَلب
لمّا يموت فيه الحَنان
والحُب
انا المُعاق فى جَسَدى مش عَقلى
طاهِر وباب السَمَا
شاهِد ومَفتوحلى
لو من عاهاتى وأُمنياتى بتِسخروا
وعَليّا يوم تتنَمَروا
إن كُنتوا مش فاهمين
تِبقوا انتوا مش شايفين
مِثال على عَقل إتوَهَب
وفِكر أغلىَ من الدَهب
أديبنا ( طَه حُسين )
أصبَح عَميد الأدَب بعَقل مش بعينين
شِعر / مجدى حسن
تعليقات
إرسال تعليق