إعزميني ع الفرح للشاعر مجدي حسن
قصيدة / إعزمينى
إعزمينى ع الفَرَح
وصدقينى
مش هجيلِك والدموع باينَه ف عيونى
هتلاقينى جيت لوَحدى
راضى ببعادِك وبُعدى
جَىّ منغير اللى كان بينِك وبينى
لَو لآخر مَرّه اشوف الإبتسامه
وانتى جَنبُه واقول حبيبتى مع السلامه
هنسىَ عُمرى معاكى
والشوق والأمانى
يجرى حِلمى وراكى أجرى واجيبه تانى
بحنين سنينى وشوق حياتى هكفّنُه
واحفُر لُه قَبر ف ذِكرياتى وادفِنُه
هقول سلام منغير كلام
يافرحَه كانِت فى الحقيقه والمنام
انا جَىّ ابارك جَىّ اهنّى
مش جَىّ اقولِ ليه ضِعتى مِنّى
محتاج اشوف اللى سَرق أحلام حياتى
من بين الوف
اختار اميرتى وامنياتى
من قلبى هدعيلِك
بفرحَه وبسعاده
يديكى أكتَر م اللى كان بيننا وزياده
عارف حبيبتى البُعد دا
ماكانش بارادتِك
وعشان كدا بتمنىَ م الأيام سعادتِك
انسِىِ كُل هَمسه بيننا
لمَسه بيننا
وابدأى معاه من جديد
اما انا من بَعد جَنّه
عُمرى يوم ماهكون سَعيد
يمكِن اللى عليّا صَعب
واللى مِنُّه هكون فى رُعب
انى مش هَسأَل عينيكى
واعرف اطَمِّن عليكى
ماتخافيش على قلبى ماخلاص اتجرَح
وانسِى حُبى واعزمينى ع الفَرَح
شِعر / مجدى حسن
تعليقات
إرسال تعليق