بستاني للشاعر مجدي حسن

 قصيدة  / بُستانى

وقالوا عَنّى بُستانى وبَجمَع م الزهور الوان

ونبضى وشوقى وحنانى بوزَعهُم فى كل مكان

وعُمر العشق ما نادانى ولا عرِفلى فى يوم عِنوان

مَلِك على عَرش مملكتى وسُكانها  من النِسوان

وبَسمَعهُم وبَتبسِّم واقول  قولوا كمان وكمان

داسِر مابينى انا ونَفسى وبين القلب والشريان

حوريه بتجرى مع دَمّى بتسقينى غَرام وحنان

لا يوم عينى تِشوف غيرها ولا تِقبَل ابات عطشان

حبيبه ف دنيتى الانثى

لابنسىَ يوم ولا تِنسىَ

 بشوفها البيضا والسَمرا عيونها السودا والخَضرا

بعيش بيها واعيش ليها

لايوم نُهجُر ولا نِقسىَ

مابينى وبينها مليون عَهد مانعرَف يوم خصام او بُعد

حِكاية عِشق بنعيشها وفرشِتنا بنفرِشها بياسمين والوسايد وَرد

اميرة عَرش مملَكتى وانا المملوك وبإرادتى

مشاعرى معاها بَظهِرها  واكون فارس من الفرسان

وفى تعاملى مَع غيرها بكون راهِب من الرُهبان

شِعر / مجدى حسن